[su_pullquote]2023માં વેનિસ આંતરરાષ્ટ્રીય ફિલ્મ ફેસ્ટિવલમાં પ્રીમિયર થયેલી એક શોર્ટ ફિલ્મ બેહદ રસપ્રદ છે. 40 મિનિટનો સમય એને ફાળવવા જેવો છે[/su_pullquote]

આપણે ત્યાં ખુદાબક્ષ સંબોધન એવા લોકો માટે થાય છે જેઓ મફતમાં કોઈક લાભ લેતા હોય. દાખલા તરીકે ટ્રેનમાં વગર ટિકિટે પ્રવાસ કરનાર ખુદાબક્ષ મુસાફર. જોકે ઘણાને એ વાતનો ખ્યાલ નહીં હોય કે આપણે ત્યાં આ નામે ખરેખર એક વ્યક્તિ થઈ ગઈ અને એ પણ અજબગજબની. એને અકલ્પનીય સિદ્ધિઓ વરી હતી એવું કહે છે. જેમ કે ખુલ્લા પગે એ ધગધગતા અંગારા પર ચાલી જાય અને તો પણ એને કશું ના થાય. એવી જ રીતે, એની આંખે પાટા બાંધો, આખું મોઢું મુશ્કેરાટ ઢાંકી દો એના પછી પણ એ વાહન હંકારી શકતો અને બિલકુલ એમ અહીંતહીં કે ગમે ત્યાં જઈ શકતો જેમ કોઈ દેખતી આંખે જાય.

એવા ખુદાબક્ષના જીવનની રોચક ઘટનાઓને આવરી લઈને એક મસ્ત મજાની શોર્ટ ફિલ્મ ‘ધ વંડરફુલ લાઇફ ઓફ હેન્રી શુગર’ બની છે. આમ તો છેક 2023માં એ બની અને નેટફ્લિક્સ પર પણ એ વરસે જ આવી ગઈ હતી. છતાં ઘણાનું એના પર ધ્યાન ના પડ્યું હોય એ શક્ય છે. ફિલ્મ છે ચાલીસેક મિનિટની. જોનારને ખુશ કરી દે એવી છે. ખુદાબક્ષનું જીવન એ તાદ્દશ કરે છે એ એનું એક કારણ. બીજું કારણ ફિલ્મનું અત્યંત નાવીન્યસભર મેકિંગ છે. પહેલાં થોડી વાત ખુદાબક્ષ વિશે કરી લઈએ અને પછી ફિલ્મની વાત પણ કરીએ જે અચૂક જોવા જેવી છે.