પહેલીવાર થયું કે નેટફ્લિક્સના કોઈ બિનઅંગ્રેજી શોએ રિલીઝ સાથે દુનિયામાં ડંકો વગાડ્યો. ‘હીરામંડી’ કે ‘બે***ડ્સ ઓફ બોલિવુડ’ જેટલી માત્રામાં દર્શકોએ એમની રિલીઝ સાથે જોઈ નહોતી એટલી જોઈ ‘તસ્કરીઃ ધ સ્મગલર્સ વેબ.’ 14 જાન્યુઆરીએ રિલીઝ થયેલી આ સિરીઝ પાંચ દિવસમાં 54 લાખ વખત જોવાઈ. એવું શું છે નીરજ પાંડેની સિરીઝમાં કે એને ચિક્કાર સફળતા મળી?

મુંબઈનું છત્રપતિ શિવાજી મહારાજ આંતરરાષ્ટ્રીય વિમાનમથક એની પશ્ચાભૂ છે. એરપોર્ટથી થતી દાણચોરીને ડામવા કસ્ટમ્સ અધિકારીઓ કઈ રીતે મથે છે એ છે કથા. અધિકારીઓમાં થોડા ઇમાનદાર અને ઘણા ભ્રષ્ટ છે. ઇમાનદાર અધિકારીઓ મોટાભાગ સસ્પેન્ડેડ છેઃ સુપરિન્ટેન્ડન્ટ અર્જુન મીના (ઇમરાન હાશમી), રવિ ગુજ્જર (નંદિશ સંધુ), મિતાલી કામત (અમૃતા ખાનવિલકર) વગેરે. એમના સસ્પેન્શન વચ્ચે મુંબઈ એરપોર્ટ પર ઇમાનદાર ઉચ્ચ અધિકારી પ્રકાશ કુમાર (અનુરાગ સિંહા)ની વરણી થાય છે. આવતાંવેંત એ ઇમાનદાર અધિકારીઓનું સસ્પેન્શન રદ કરીને આદેશ આપે છે, “ફરી કામે ચડી જાવ.”

આ ઉચ્ચ અધિકારી ઉપર છે સર્વોચ્ચ અધિકારી પણ. એ છે માટીપગો અને તકસાધુ. ભ્રષ્ટાચાર સામે એને વાંધો નથી. એની એમાં સાંઠગાંઠ પણ છે. ભ્રષ્ટાચાર એમના મતે સિસ્ટમનો એક અનિવાર્ય હિસ્સો છે. કહેવા ખાતર એ પ્રકાશને છૂટો દોર આપે છે પણ હકીકત જરા અલગ છે.

દુનિયાના બીજા ખૂણે દાણચોરો છે. બડા ચૌધરી (શરદ કેળકર) એમનો સુકાની છે. સોનું, ડ્ર્ગ્સ, રમકડાં, મોંઘીદાટ ઘડિયાળોથી માંડીને જાતજાતની દાણચોરી એરપોર્ટ પર રોજિંદી બાબત છે. ચૌધરીની સિંડિકેટ વિવિધ શહેરોમાં ફેલાયેલી છે. પોતાના નેટવર્ક, કડદા અને કાયદા-ગુનાખોરી પરની પકડને ચૌધરી બરાબર જાણે છે. જોકે ઇમાનદાર અધિકારીઓ અને પ્રકાશ કુમારના આવ્યા પછી એના સામ્રાજ્ય સામે પ્રશ્ન ખડો થઈ શકે છે. એમાં અર્જુન એના સંપર્કમાં આવેલી પ્રિયા (ઝોયા અફરોઝ)ને ચૌધરી સિંડિકેટમાં સિફતપૂર્વક પ્રવેશ કરાવે છે. બસ, મામલો સંગીન થવા માંડે છે. અર્જુન એન્ડ પાર્ટી દાણચોરીને જેર કરવા તો ચૌધરી પોતાની સર્વોપરિતા ટકાવી રાખવા જંગે ચડે છે અને…

‘તસ્કરી’ જોવાલાયક હોવાનાં કારણો કયાં છે? સૌપ્રથમ, કસ્ટમ્સની દુનિયાને એ વિગતવાર અને રોચક રીતે રજૂ કરે છે. એરપોર્ટની પ્રથમદર્શી જડબેસલાક લાગતી વ્યવસ્થા પાછળની નબળાઈઓ, ગતિવિધિઓ આ રીતે કદાચ પહેલીવાર જોવા મળી છે. અથવા કહો કે ઓટીટીના ફલક પર એનું આ વ્યવસ્થિત પ્રથમાગમન છે.  બીજું, સિરીઝમાં એરપોર્ટ જોવાની મજા પડે છે. ભલે ઘણું શૂટિંગ સેટ્સ પર થયું હોય તો શું, ઇટ્’સ ઇન્ટરેસ્ટિંગ. જૂની ફિલ્મોમાં, સિત્તેરના દાયકાની ફિલ્મોમાં, દાણચોરી દેખાતી પણ એના કરતાં હવે રીત અલગ છે. હવે દાણચોરો અને અધિકારીઓ બેઉ પક્ષે અનેક નવાં ઉપાય અને મારણ છે. સિરીઝમાં એ જોવું રોચક છે.

નેક્સ્ટ કારણ દમદાર નિર્માણ છે. મુંબઈ સહિત દેશ-વિદેશનાં લોકાલ્સ મસ્ત રીતે રજૂ થયાં છે. અલ દેરા, મિલાન, એડિસ અબાબા જેવાં શહેરો, મુંબઈ સિવાયનાં અગત્યનાં લોકેશન્સ છે. કાસ્ટિંગ પણ સરસ છે. હાશમી, કેળકર, અમૃતા ખાનવિલકર, જમીલ ખાન, હેમંત ખેર, વીરેન્દ્ર સકસેના જાણીતાં છે. બાકીનાં કલાકારો સરપ્રાઇઝ પેકેજ તરીકે ખુશ કરી દે છે. થોડા આ પહેલાં લીડમાં કે અગત્યના પાત્રમાં દેખાયા છે પણ અહીં ધ્યાન ખેંચે છે. નંદિશ સંધુ, અનુરાગ સિંહા, ઝોયા અફરોઝ, સુમીત નિઝાવન, અનુજા સાઠે, અક્ષયા નાઇક, ફ્રેડી દારૂવાલા, શાહિદ લતીફ તથા અન્ય કલાકારો ગમી જાય છે. ખાસ કરીને સંધુ અને સિંહા.

પાંડેને આ પ્રકારના વિષયોમાં સંશોધનનો ઉપયોગ કરીને રોચક કથા રજૂ કરવાની ફાવટ છે. એમની  તાકાતને કારણે સાધારણ પટકથા-સંવાદો પણ પ્રવાહિત અને પરફેક્ટ લાગે છે. સૌને એકતાંતણે બાંધતા લખાણમાં ગરબડ નથી, છતાં, રોમાંચની ખરેખર છેલ્લા બે એપિસોડ્સમાં વર્તાય છે. એ પહેલાં સિરીઝ ધારી શકાય એવી બાબતોથી ગાડું ગબડાવી શકી છે.

અમુક સરેરાશ બાબતો પણ છે. એના લીધે સિરીઝની લંબાઈ વધી છે, ઊંડાણ નહીં. જેમ કે, છોટા-બડા ચૌધરીની બેક સ્ટોરી. દાખલા તરીકે અક્ષયાનો ટ્રેક. દાખલા તરીકે, અંજામ સુધી પહોંચવા (‘ફેમિલી મેન’ની સ્ટાઇલમાં, એકાદ દ્રશ્ય પછી) છેવટે પ્રગટ થતું શ્રીકાંત સકસેનાનું પાત્ર. આરંભે શૂરાના નાતે સબળ શરૂઆત પછી સિરીઝ ફટાફટ બીબાઢાળ થઈ જાય છે. ક્લાઇમેક્સ ધડધડ કરતાંક આવતો નથી, સીધો ઢાળી દેવાય છે.

લેખક બેલડી નીરજ પાંડે અને વિપુલ કે. રાવલ છે. મોંઘી અને અન્યથા મજેદાર સિરીઝમાં એમનું લખાણ ઓછું પડે છે. પાત્રાલેખન, લગભગ બધાં જ કેરેક્ટર્સના કિસ્સામાં, અધકચરું છે. ઇમાનદાર અધિકારીઓની નાનકડી ફોજ છતાં એકપણ સ્ટેન્ડઆઉટ નથી. હાશમી પણ નહીં. હાશમી અને સિંહા બે મુખ્ય અંતિમો હોવા છતાં બેઉ પડદે અપૂરતા દેખાય છે. પ્રિયા અને મીનાક્ષી એમ બે પાત્રોનો પણ કલ્પનાશીલ ઉપયોગ નથી કરી શકાયો. ખલનાયકોની ફોજના લીડર કેળકરનું પાત્ર વિલન ઓછું અને મોડેલ વધારે છે. સ્ટાઇલમાં અને સશક્તતામાં ફરક હોય છે. બાકીનાં ખલનાયકો ઉપલક જ રહી ગયા છે.

પાંડે સાથે સિરીઝનું દિગ્દર્શન રાઘવ એમ. જયરથ અને બી. એ. ફિદાએ કર્યું છે. ‘તસ્કરી’માં સાત એપિસોડ્સ છે. પાંચ કલાક ચોવીસ મિનિટ એની લંબાઈ છે. નિર્માતા શીતલ ભાટિયા છે. બેનર ફ્રાઇડે સ્ટોરીટેલર્સ છે. ટૂંકમાં, આ સિરીઝ જોવાનાં કારણો છે તો ટાળવાનાં કારણો પણ છે. જેની જેવી પસંદ, એવો એનો નિર્ણય હોઈ શકે છે.

નવું શું છે

• શોન્ડા રાઇમ્સની સફળ રહેલી વેબ સિરીઝ, ‘બ્રિજર્ટન’ની ચોથી સીઝનનો ભાગ એક ગઈકાલથી નેટફ્લિક્સ પર સ્ટ્રીમ થઈ ગયો છે. આ સીઝનમાં કુલ આઠ એપિસોડ છે. જેમાં ચાર ભાગ ગઈકાલે રિલીઝ થયા અને ચાર એપિસોડ ૨૬ ફેબ્રુઆરીના રોજ બીજા ભાગમાં રિલીઝ થશે.
• મોટા પડદે બહુ ગાજેલી બ્લોકબસ્ટર સ્પાય-થ્રિલર ફિલ્મ ‘ધુરંધર’ આજથી નેટફ્લિક્સ પર આવી છે. આ ફિલ્મમાં રણવીર સિંહ, અક્ષય ખન્ના, આર માધવન અને અર્જુન રામપાલ તથા અન્ય કલાકારો છે.
• ડિરેકટર અમૃત રાજ ગુપ્તાની ડાર્ક સોશિયલ ડ્રામા ફિલ્મ ‘દલદલ’ આજથી એમેઝોન પ્રાઇમ વિડીયો પર જોવા મળશે. આ ફિલ્મમાં ભૂમિ પેડનેકર, આદિત્ય રાવલ, સમારા તિજોરી, ગીતા અગ્રવાલ, ચિન્મય માંડલેકર વગેરે કલાકારો છે.
• મલયાલમ હોરર-કોમેડી ફિલ્મ ‘સરવમ માયા’ આજથી જિયોહોટસ્ટાર પર જોવા મળશે. તેનું નિર્દેશન અખિલ સાથ્યાને કર્યું છે. તેમાં અજુ વર્ગીસ અને રિયા શિબુ પણ છે. આ ફિલ્મ હિન્દીમાં પણ ઉપલબ્ઘ છે.

આ લેખ ગુજરાત સમાચારમાં વાંચવા અહીં ક્લિક કરોઃ

https://epaper.gujaratsamachar.com/chitralok/30-01-2026/6